ଓଡ଼ିଆ ଅସ୍ମିତାକୁ ଜଗୁଛି ତାମିଲ ସନ୍ନ୍ୟାସୀ
Editor
ଭୁବନେଶ୍ବର, ୩/୩ : ଜୁନ୍ ୯ ତାରିଖ ହଠାତ୍ ଏକ ଭିଡ଼ିଓ ସୋସିଆଲ ମିଡ଼ିଆରେ ଆସିଲା । ସେଥିରେ ଆରପଟୁ ଆସିଥିଲା ଭି.କେ ପାଣ୍ଡିଆନ୍ଙ୍କ ବାର୍ତ୍ତା - ମୁଁ ବିଜେଡିରୁ ଅବସର ନେଉଛି । ଏହାପରେ ରାଜ୍ୟ ରାଜନୀତିରେ ଏକ ଝଡ଼ ସୃଷ୍ଟି ହୋଇଥିଲା । କିଏ ଭିକେ ପାଣ୍ଡିଆନଙ୍କ କୃରତାରୁ ଆଶ୍ବସ୍ତି ନେଇଥିଲା ତ ଆଉ କାହା ମୁଣ୍ଡରେ ଚଡ଼କ ପଡ଼ିଥିଲା । ଯେଉଁମାନେ ପାଣ୍ଡିଆନଙ୍କ ଛତ୍ରଛାୟା ତଳେ ଥିଲେ ସେମାନେ ମୁଣ୍ଡରେ ହାତ ଦେଇଥିଲେ । କ’ଣ ହେବ ତାଙ୍କ ଭାଗ୍ୟ ତାହା ଭାଳେଣି ପଡ଼ିଥିଲା । ଅଘୋଷିତ ରାଜା ଭାବେ ବିଜେଡିକୁ ପରିଚାଳିତ କରୁଥିବା ପାଣ୍ଡିଆନ ହଠାତ୍ ରାଜ୍ୟ ରାଜନୀତିର ଶୀର୍ଷକୁ ପଳାଇଆସିଥିଲେ । ଏହାପରେ ସେ ରାଜ୍ୟରେ ଏକ ପ୍ରକାର ଏକଛତ୍ରବାଦ ଶାସନ ଚଳାଇଥିଲେ । ଯାହାପରେ ନେତା ଠୁ ଜନତାଙ୍କ ଭିତରେ କୋକୁଆ ଭୟ ସୃଷ୍ଟି ହୋଇଥିଲା । ବିଜେଡି ସୁପ୍ରିମୋଙ୍କୁ ଭେଟିବାକୁ ନାକେଦମ ହେଉଥିଲେ ନେତା। ପାଣ୍ଡିଆନ ହିଁ ଦଳକୁ କବ୍ଜା କରି ରଖିଥିଲେ । ମାତ୍ର ଏହା ବେଶୀ ଦିନ ଚାଲିଲାନି । ବିଜେଡି ୨୦୨୪ ନିର୍ବାଚନ ପରାଜୟ ପରେ ପାଣ୍ଡିଆନ ଦଳରୁ ଅବସର ନେଲେ । କାରଣ ସେ ନିର୍ବାଚନ ପ୍ରଚାରରେ କହିଥିଲେ ଯଦି ବିଜେଡି ହାରିବ ମୁଁ ରାଜନୀତିରୁ ସନ୍ନ୍ୟାସ ନେବି । ଏହା ପରେ ସେ ଏକ ଭିଡ଼ିଓ ସେୟାର କରି ହାତ ଯୋଡ଼ି ବିଜେଡି କର୍ମକର୍ତ୍ତାଙ୍କୁ ଭୁଲ୍ ମାଗିଥିଲେ ।
ଭିଡିଓ ବାର୍ତ୍ତା ଜାରି କରି ଭି.କେ ପାଣ୍ଡିଆନ୍ କହିଥିଲେ, ମୁଁ ଗୋଟିଏ ଛୋଟିଆ ଗାଁର ଏକ ବିନମ୍ର ପରିବାରରୁ ଆସିଛି। ଆଇଏଏସ୍ ଅଫିସର ହୋଇ ଲୋକଙ୍କ ପାଇଁ ସେବା କରିବାକୁ ପିଲା ଦିନରୁ ସ୍ୱପ୍ନ ଦେଖୁଥିଲି। ପ୍ରଭୁ ଜଗନ୍ନାଥଙ୍କ କୃପାରୁ ଏହା ସମ୍ଭବ ହୋଇଛି। ମୋ ପରିବାର କେନ୍ଦ୍ରପଡ଼ାର ହୋଇଥିବାରୁ ମୁଁ ଓଡ଼ିଶା ଆସିବାକୁ ସୁଯୋଗ ପାଇଥିଲି।
ଏ ମାଟିରେ ପାଦ ଦେବା ଠାରୁ ଓଡ଼ିଶାବାସୀଙ୍କଠାରୁ ଭଲ ପାଇବା ଓ ସ୍ନେହ ପାଇଛି। ଧର୍ମଗଡ଼ରୁ ଆରମ୍ଭ କରି ରାଉରକେଲା,ମୟୂରଭଞ୍ଜ, ଗଞ୍ଜାମ ଯାଏ ମୁଁ ଲୋକମାନଙ୍କ ପାଇଁ ବହୁ ପରିଶ୍ରମ ସହ କାମ କରିବାକୁ ଚେଷ୍ଟା କରିଛି। ୧୨ବର୍ଷ ତଳେ ମୁଖ୍ୟମନ୍ତ୍ରୀଙ୍କ ଅଫିସରେ ଯୋଗଦେଇଥିଲି। ନବୀନ ପଟ୍ଟନାୟକଙ୍କ ପାଇଁ କାମ କରିବା ମୋ ପାଇଁ ସମ୍ମାନର ବିଷୟ ଥିଲା।
ଜୀବନରେ ତାଙ୍କଠାରୁ ବହୁ ଶିଖିଛି। ନେତୃତ୍ୱ, ନୀତି ଓ ଏହାଛଡ଼ା ଓଡ଼ଶା ଲୋକଙ୍କ ପ୍ରତି ତାଙ୍କର ଭଲପାଇବା ମୋତେ ପ୍ରଭାବିତ କରିଥିଲା। ଓଡ଼ିଶା ପାଇଁ ତାଙ୍କର ଥିବା ଦୂରଦୃଷ୍ଟି ଲାଗୁ କରିବା ହିଁ ସେ ମୋ ଠାରୁ ଆଶା ରଖିଥିଲେ। ସେ ସଫଳତାର ବହୁ କୀର୍ତ୍ତିମାନ ଅତିକ୍ରମ କରିଛନ୍ତି। ସ୍ୱାସ୍ଥ୍ୟ, ଶିକ୍ଷା, ଦ୍ରାରିଦ୍ର୍ୟ ଦୂରୀକରଣ, କ୍ରୀଡ଼ା, ପୁଞ୍ଜିନିବେଶ, ନାରୀ ସଶକ୍ତିକରଣ, ଭିତ୍ତିଭୂମିର ବିକାଶ ଓ ମନ୍ଦିର ଐତିହ୍ୟର ବିକାଶ ହୋଇଛି ବୋଲି ପାଣ୍ଡିଆନ୍ କହିଥିଲେ।
ସେ ଆହୁରି କହିଥିଲେ, କଲେଜ ଓ ସ୍କୁଲ ପିଲାଙ୍କ ପାଇଁ କାମ କରିବ ମୋତେ ଆତ୍ମ ସନ୍ତୋଷ ଦେଇଛି। ସରକାରୀ ସ୍କୁଲ ପଢ଼ୁଥିବା ବେଳେ ମୋ ପାଖରେ ପିଲା ଦିନର ଅଭିଜ୍ଞତା ନବୀନ ପଟ୍ଟନାୟକଙ୍କ ସ୍କୁଲ ନବୀକରଣ ଦୂରଦୃଷ୍ଟିକୁ 5-T ମାଧ୍ୟମରେ ଲାଗୁ କରିବାରେ ମୋତେ ସହାୟକ ହୋଇଥିଲା। କୋଭିଡ୍ ସମୟରେ ସ୍ୱାସ୍ଥ୍ୟ ଭିତ୍ତିଭୂମି ସଜାଡ଼ିବା ଲକ୍ଷ୍ୟରେ ଆମେ ପ୍ରାୟ ୩୦ ଜିଲ୍ଲା ଗସ୍ତ କରିଥିଲୁ। ସେହି ସମୟରେ ଆମେ ଦୁଇଟି ବାତ୍ୟା ଫନି ଓ ଫାଇଲିନର ସମ୍ମୁଖୀନ ହୋଇଥିଲୁ। ସେହି ସମୟରେ ପ୍ରତିଟି ଜୀବନ ବଞ୍ଚାଇବା ପାଇଁ ବହୁ କଠିନ ପରିଶ୍ରମ କରିଥିଲୁ ବୋଲି ସେ କହିଥିଲେ ।
ପାଣ୍ଡିଆନ୍ କହିଥିଲେ, ମୁଁ ଆଇଏଏସ୍ ଚାକିରିରୁ ସ୍ୱେଚ୍ଛାକୃତ ଅବସର ନେଇ ବିଜେଡିରେ ଯୋଗଦେଇଥିଲି। ମୁଁ ମୋ ମେଣ୍ଟୋର ନବୀନ ପଟ୍ଟନାୟକଙ୍କୁ ସାହାଯ୍ୟ କରିବାକୁ ଚାହୁଁଥିଲି। ତାଙ୍କ ସହଯୋଗ କରିବା ହିଁ ମୋର ଏକମାତ୍ର ଉଦ୍ଦେଶ୍ୟ ରହିଥିଲା। ରାଜନୀତିକୁ ମୁଁ କମ ସମୟ ହେଲା ଆସିଥିବାରୁ ସମ୍ଭବତଃ ମୁଁ ରାଜନୀତିକ ଅପପ୍ରଚାର ଓ ଧାରଣାକୁ ଠିକ ସମୟରେ ସଫଳତାର ସହ କାଉଣ୍ଟର କରିବାରେ ବିଫଳ ହୋଇଥିଲି। ମୁଁ ପୁଣି କହିବାକୁ ଚାହୁଁଛି ଯେ ମୁଁ କେବଳ ମୋ ମେଣ୍ଟର ନବୀନ ପଟ୍ଟନାୟକଙ୍କୁ ସହଯୋଗ କରିବାକୁ ରାଜନୀତିକୁ ଆସିଥିଲି।
ଏହାଛଡ଼ା ଅନ୍ୟ କୌଣସି ଲକ୍ଷ୍ୟ ନେଇ ମୁଁ ବିଜେଡିକୁ ଆସିନଥିଲି। ଏଥିପାଇଁ କୌଣସି ଦଳୀୟ ପଦ ପଦବୀରେ କିମ୍ବା ପ୍ରାର୍ଥୀ ହୋଇ ନଥିଲି। ଦୀର୍ଘ ୧୨ ବର୍ଷ ହେବ ମୁଁ ଭୋର ୪ଟାରୁ ବିଳମ୍ୱିତ ରାତି ପର୍ଯ୍ୟନ୍ତ କାମ କରୁଥିଲି। ଓଡ଼ିଶା ଓ ନବୀନ ପଟ୍ଟନାୟକଙ୍କୁ ଫୋକସରେ ରଖି ମୁଁ କାମ କରି ଚାଲିଥିଲି। ଆଜି ପର୍ଯ୍ୟନ୍ତ ମୋର ସମ୍ପତ୍ତି ହେଉଛି ମୋ ବ୍ୟାଙ୍କ ବାଲାନ୍ସ। ଏହାଛଡ଼ା ମୋ ପାଖରେ କିମ୍ବା ମୋ ପାରିବାର ପାଖରେ ବିଶ୍ୱର କୌଣସି ସ୍ଥାନରେ ସମ୍ପତ୍ତି ନାହିଁ। ଭାରତୀୟ ପ୍ରଶାସନିକ ସେବାରେ ଯୋଗ ଦେବା ବେଳେ ମୋ ସମ୍ପତ୍ତି ବିବୃତି ଯାହା ଥିଲା, ଏବେ ୨୪ ବର୍ଷ ପରେ ମଧ୍ୟ ସେୟା ଅଛି।
ମୋ ଜୀବନରେ ସବୁଠାରୁ ବଡ଼ ସମ୍ପତ୍ତି ହେଉଛି ଓଡ଼ିଶାର ଲୋକବାସୀଙ୍କ ଭଲ ପାଇବା ଓ ସ୍ନେହ। ନବୀନ ବାବୁଙ୍କୁ ସହଯୋଗ କରିବା ହିଁ ମୋର ମୁଖ୍ୟ ଉଦ୍ଦେଶ୍ୟ ଥିଲା। ଏଥିପାଇଁ ମୁଁ ରାଜନୀତିରେ ସାମିଲ ହୋଇଥିଲି। କିନ୍ତୁ ଆଜି ମୁଁ ଏବେ ରାଜନୀତିରୁ ଅବସର ନେବାକୁ ନିଷ୍ପତ୍ତି ନେଇଛି। ରାଜନୀତି ଯାତ୍ରାରେ ଯଦି ମୁଁ କାହାକୁ କଷ୍ଟ ଦେଇଛି, ତା’ହେଲେ ମୁଁ ଦୁଃଖିତ। ମୋ ବିରୋଧରେ ହେଉଥିବା ପ୍ରଚାର ଯୋଗୁ ଯଦି ବିଜୁ ଜନତା ଦଳ କ୍ଷତି ସହିଛି, ସେଥିପାଇଁ ମଧ୍ୟ ଆଇ ଆମ ସରି। ମୁଁ ହାତ ଯୋଡ଼ି ପୂରା ବିଜୁ ପରିବାରକୁ କ୍ଷମା ମାଗୁଛି। ମୋ ସହ ଜଡ଼ିତ ହୋଇ କାମ କରିଥିବା ଲକ୍ଷାଧିକ ବିଜୁ ପରିବାର କର୍ମୀମାନଙ୍କୁ କୃତଜ୍ଞତା ଜଣାଉଛି। ସବୁବେଳେ ଓଡ଼ିଶା ମୋ ହୃଦୟରେ ରହିବ। ଜୟ ଜଗନ୍ନାଥ।”
ସେ ରାଜନୀତୀରୁ ସନ୍ନ୍ୟାସ ନେଲେ ସତ କିନ୍ତୁ ଭିତରେ ରହି ସବୁ କିଛି ମ୍ୟାନେଜ କରୁଛନ୍ତି । ବିଜେପି ସରକାର ଗଢିଛି । ଏହାକୁ କାଉଣ୍ଟର କରିବାକୁ ସନ୍ନ୍ୟାସୀ ବେଶ ଧାରୀ ପାଣ୍ଡିଆନ ଯେମିତି ଜଗି ବସିଛନ୍ତି । ବିଜେପିର ଭୁଲକୁ ସୋସିଆଲ ମିଡ଼ିଆରେ ବାରମ୍ବାର ଟାର୍ଗେଟ କରୁଛନ୍ତି ଭିକେ ପାଣ୍ଡିଆନଙ୍କ ସୋସିଆଲ ମିଡ଼ିଆ ପେଜ୍ । ଆଗକୁ ଆସିପାରୁନାହାନ୍ତି ସତ କିନ୍ତୁ ଟିକେ ବି ଭୁଲ୍ ବାହାର କରିବାକୁ ପଛ ଘୁଞ୍ଚା ଦେଉନାହାନ୍ତି ଏହି ଆତ୍ମଘୋଷିତ ସନ୍ନ୍ୟାସୀ । ଏହାକୁ ନେଇ ଏବେ ସବୁଆଡ଼େ ଚର୍ଚ୍ଚା ସନ୍ନ୍ୟାସୀ ମୂଳ ଉଦ୍ଦେଶ୍ୟ କ’ଣ ?
