ପଦ୍ମବିଭୂଷଣ ପଣ୍ଡିତ ଛନ୍ନୁଲାଲ ମିଶ୍ରଙ୍କ ନିଧନରେ ପ୍ରଧାନମନ୍ତ୍ରୀଙ୍କ ଶୋକ

ନୂଆଦିଲ୍ଲୀ,୨/୧୦ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପଣ୍ଡିତ ଛନ୍ନୁଲାଲ ମିଶ୍ରଙ୍କ ପରଲୋକରେ ଗଭୀର ଦୁଃଖ ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି କି, ପଣ୍ଡିତ ଛନ୍ନୁଲାଲ ମିଶ୍ରଙ୍କ ପରଲୋକ ଭାରତର ସଙ୍ଗୀତ ଜଗତ ପାଇଁ ଏକ ଅପୂରଣୀୟ କ୍ଷତି । ସେ କହିଛନ୍ତି, ପଣ୍ଡିତ ଛନ୍ନୁଲାଲ ମିଶ୍ର ଜୀବନବ୍ୟାପୀ କଳା ଓ ସଂସ୍କୃତି ପ୍ରତି ସମର୍ପିତ ଥିଲେ ଏବଂ ସେ ବନାରସ ଘରାନାର ସଙ୍ଗୀତ ପରମ୍ପରାକୁ ନୂତନ ଶୀର୍ଷରେ ପହଞ୍ଚାଇବା ଦିଗରେ କାମ କରିଥିଲେ ।

ସେ କହିଛନ୍ତି କି, କାଶୀର ପରମ୍ପରା ଏବଂ ଉତ୍ସବକୁ ପଣ୍ଡିତ ମିଶ୍ର ନିଜ ସ୍ୱର ଏବଂ ଗୀତରେ ସମୃଦ୍ଧ କରିଥିଲେ । ମଣିକର୍ଣ୍ଣିକା ଘାଟରେ ହୋଲି ହେଉ କିମ୍ବା ବର୍ଷା ଦିନର କାଜରୀ ପରମ୍ପରା ହେଉ ତାଙ୍କ ସଙ୍ଗୀତରେ କାଶୀ ସର୍ବଦା ଗୁଞ୍ଜରିତ ହେଉଥିବ । ଲୋକଗୀତର ମହତ୍ୱପୂର୍ଣ୍ଣ ବିଦ୍ୟାକୁ ବିଶ୍ୱ ମଞ୍ଚରେ ପ୍ରତିଷ୍ଠିତ କରିବାରେ ପଣ୍ଡିତ ମିଶ୍ରଙ୍କ ଦ୍ୱାରା ହୋଇଥିବା କାର୍ୟ୍ୟ କୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ ।

ପ୍ରଧାନମନ୍ତ୍ରୀ ମୋଦୀ ନିଜ ବ୍ୟକ୍ତିଗତ ଅନୁଭବ ସେୟାର କରି କହିଛନ୍ତି, ଅନେକ ଥର ପଣ୍ଡିତ ମିଶ୍ରଙ୍କୁ ସାକ୍ଷାତ କରିବା ଏବଂ ତାଙ୍କ ସ୍ନେହ ପାଇବାର ଅବସର ମିଳିଛି । ୨୦୧୪ ନିର୍ବାଚନରେ ପଣ୍ଡିତ ଛନ୍ନୁଲାଲ ମିଶ୍ର ତାଙ୍କ ପ୍ରସ୍ତାବକ ହୋଇଥିଲେ- ଏହି କଥାକୁ ସ୍ମରଣ କରି ପ୍ରଧାନମନ୍ତ୍ରୀ କହିଛନ୍ତି କି, କାଶୀ ପ୍ରତି ପଣ୍ଡିତ ମିଶ୍ରଙ୍କ ଆତ୍ମୀୟ ଭାବ ଅଦ୍ୱିତୀୟ ଥିଲା । ପ୍ରଧାନମନ୍ତ୍ରୀ କହିଛନ୍ତି କି, କାଶୀ ବିକାଶ ଏବଂ ପରମ୍ପରା ଉପରେ ପଣ୍ଡିତ ମିଶ୍ର ତାଙ୍କୁ ଅନେକ ଥର ମହତ୍ୱପୂର୍ଣ୍ଣ ପ୍ରସ୍ତାବ ଦେଇଛନ୍ତି । ଏଥିସହ ପ୍ରଧାନମନ୍ତ୍ରୀ ଏହା ମଧ୍ୟ କହିଛନ୍ତି କି ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀରେ କିପରି ସେ ତାଙ୍କ ବାସଭବନକୁ ଯାଇଥିଲେ, ଯାହାକି ଆଜି ଗାନ୍ଧୀ ଜୟନ୍ତୀରେ ଏହି ବାର୍ତ୍ତା ଲେଖିବା ବେଳେ ତାଙ୍କ ପାଇଁ ଜୀବନ୍ତ ହୋଇଉଠୁଛି । ଯଦିଓ ପଣ୍ଡିତ ମିଶ୍ର ଆଜି ସଶରୀରେ ଆମ ଗହଣରେ ନାହାନ୍ତି, କିନ୍ତୁ ଭାରତର ପ୍ରତ୍ୟେକ ସଙ୍ଗୀତ ପ୍ରେମୀ ତାଙ୍କ ଜୀବନରୁ ପ୍ରେରଣା ନେଇ ଚାଲିଥିବେ ଏବଂ କାଶୀ ତାଙ୍କ ଭଜନ ଦ୍ୱାରା ତାଙ୍କୁ ପ୍ରତ୍ୟେକ ଉତ୍ସବରେ ସ୍ମରଣ କରୁଥିବ ।

ପ୍ରଧାନମନ୍ତ୍ରୀ ପଣ୍ଡିତ ମିଶ୍ରଙ୍କ ଶୋକ ସନ୍ତପ୍ତ ପରିବାର ପ୍ରତି ତାଙ୍କର ସମବେଦନା ବ୍ୟକ୍ତି କରି କହିଛନ୍ତି, ତାଙ୍କ ପରିଜନଙ୍କ ପୀଡ଼ା ତାଙ୍କପାଇଁ ବ୍ୟକ୍ତିଗତ ପୀଡ଼ା । ବାବା ବିଶ୍ୱନାଥ ପଣ୍ଡିତ ଛନ୍ନୁଲାଲ ମିଶ୍ରଙ୍କୁ ତାଙ୍କ ଚରଣରେ ସ୍ଥାନ ଦିଅନ୍ତୁ ଏବଂ ଏହି ଦୁଃଖର ସମୟରେ ତାଙ୍କ ପ୍ରଶଂସକଙ୍କୁ ଧୈର୍ୟ୍ୟ ପ୍ରଦାନ କରିବାକୁ ପ୍ରଧାନମନ୍ତ୍ରୀ ପ୍ରାର୍ଥନା କରିଛନ୍ତି ।