ନାବାଳିକା ଝିଅକୁ ଦୁର୍ବ୍ୟବହାର କରି ଜଣେ ବ୍ୟକ୍ତି ଗିରଫ

ଭୁବନେଶ୍ବର, ୪/୧ : ମହଙ୍ଗା ପଡ଼ିଲା ନାବାଳିକା ଝିଅକୁ ଦୁର୍ବ୍ୟବହାର କରିବା । ଖଣ୍ଡଗିରି ଥାନା ପୁଲିସ ଜନୈକ ବ୍ୟକ୍ତିଙ୍କୁ ଗିରଫ କରିଛି । ଗିରଫ ଜଣକ ହେଲା ଡୁମଡୁମା ବାସିନ୍ଦା ମିଟୁ ଓରଫ ଶିଶିର କୁମାର ରାଉତ (୪୩) ।

ସୂଚନାଯୋଗ୍ୟ ଯେ, ଅଭିଯୋଗକାରିଣୀ ପରିବାର ସହ ଡୁମୁଡୁମା ଅଞ୍ଚଳରେ ରହୁଥିବାବେଳେ, ଅଭିଯୁକ୍ତ ମିଟୁ ଗତ ୩/୪ ମାସ ହେବ ତାଙ୍କ ପଡୋଶୀ ଭାବେ ରହିଆସୁଛନ୍ତି । ଅଭିଯୋଗକାରିଣୀଙ୍କ ଏକ ନାବାଳିକା ଝିଅକୁ ଅଭିଯୁକ୍ତ ମିଟୁ ନିୟମିତ ଭାବେ ପିଛା କରୁଥିଲେ । ଗତ କାଲି ଅପରାହ୍ନରେ ସମ୍ପୃକ୍ତ ଝିଅ ଜଣକ ସ୍କୁଲରୁ ଫେରିବା ରାସ୍ତାରେ ଅଭିଯୁକ୍ତ ମିଟୁ ମନ୍ଦ ଉଦ୍ଦେଶ୍ୟ ରଖି ଝିଅର ହାତକୁ ଟାଣି ଦେଇଥିଲେ । ଏହାର ବିରୋଧ କରିବାରୁ ଅଭିଯୁକ୍ତ ଜଣକ ତାଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ ।

ଘରକୁ ଫେରି ଝିଅ ନିଜ ମାଙ୍କୁ ସମସ୍ତ କଥା ଜଣାଇ ଥିଲେ । ପରେ ଅଭିଯୋଗକାରିଣୀ ଏବଂ ତାଙ୍କ ସ୍ବାମୀ ଘଟଣା ସମ୍ପର୍କରେ ପଚାରି ବୁଝିବା ଲାଗି ଅଭିଯୁକ୍ତଙ୍କ ଘରକୁ ଯାଇଥିବା ବେଳେ, ସେଠାରେ ଉଭୟ ପକ୍ଷ ମଧ୍ୟରେ ଝଗଡା ହୋଇଥିଲା । ଅଭିଯୁକ୍ତ ଜଣକ ଉଭୟଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହିତ ହଠାତ ଉତକ୍ଷିପ୍ତ ହୋଇ ଅଭିଯୋଗକାରିଣୀଙ୍କୁ ଏକ ଲୁହା ପାଇପ ସାହାଯ୍ୟରେ ଆକ୍ରମଣ କରିଥିଲେ ଏବଂ ଜୀବନରୁ ମାରିଦେବାର ଧମକ ମଧ୍ୟ ଦେଇଥିଲେ । ଫଳରେ ଅଭିଯୋଗକାରିଣୀଙ୍କ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଥିଲା ।

ଅଭିଯୋଗ ଆଧାରରେ ମାମଲାର ତଦନ୍ତ କରି ପୁଲିସ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ସେ ତାଙ୍କର ଦୋଷ ସ୍ଵୀକାର କରିଥିଲେ ।  ପୋଲିସ ମିଟୁକୁ ଗିରଫ କରି କୋର୍ଟ ଚାଲାଣ କରିଛି । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।