‘ବୋଉ ବୁଟୁ ଭୂତ’ ଫିଲ୍ମ ସୁଟିଂ କରି ଜିନିଷ ନଷ୍ଟ କଲେ, ଫିଲ୍ମ ହିଟ୍ ହେବା ପରେ ଧରା ଦେଉନାହାନ୍ତି

ଭୁବନେଶ୍ବର,୧୮/୭ : ସିନେମା ସୁଟିଂ ହେଲା । ସୁଟିଂ ସେଟରେ ଲାଗିଥିବା ଜିନିଷ ଭଙ୍ଗାରୁଜା ବି ହେଲା । ସୁଟିଂ ସରିଗଲା, ନେତାଙ୍କ ଭଳି ପ୍ରତିଶ୍ରୁତି ବି ଦିଆଗଲା । ମାତ୍ର ଫିଲ୍ମ ହିଟ୍ ହେବା ପରେ ଧରା ଛୁଆଁ ଦେଉନାହାନ୍ତି ପ୍ରଯୋଜନା ସଂସ୍ଥା । ଏଭଳି ଏକ ଅଭିଯୋଗ ଆସିଛି ନିକଟରେ ରିଲିଜ ହୋଇଥିବା ଓଡ଼ିଆ ହରର ଫିଲ୍ମ ‘ବୋଉ ବୁଟୁ ଭୂତ’ ନାଁରେ । ଆଜ୍ଞା ହଁ କଥାଟା ଆଶ୍ଚର୍ଯ୍ୟ ଲାଗୁଥିଲେ ବି ସତ । ଫିଲ୍ମ ଦୁନିଆରେ ଏଭଳି ଘଟଣା କିଛି ନୂଆ ନୁହେଁ । ସେ କଳାକାରଙ୍କ ଟଙ୍କା ହେଉ କିମ୍ବା ନିର୍ଦେଶକଙ୍କ । ମାତ୍ର ଜଣେ ସାଧାରଣ ଲୋକର ଘରେ ସୁଟିଂ କରି ତାକୁ ଭୂଆଁ ବୁଲାଇବାକୁ ନେଇ ଏବେ ସାଧାରଣରେ ବେଶ ଚର୍ଚ୍ଚାର ଖୋରାକ ଯୋଗାଇଛି । 

ଫିଲ୍ମ ବକ୍ସ ଅଫିସରେ ଭଲ ଆୟ କରିଛି । ୨ କୋଟି ଟଙ୍କା ଖର୍ଚ୍ଚରେ ନିର୍ମିତ ହୋଇଥିବା ଏହି ଚଳଚ୍ଚିତ୍ରଟି ବର୍ତ୍ତମାନ ସୁଦ୍ଧା ୧୬କୋଟିରୁ ଅଧିକ ଆୟ କରି ସାରିଲାଣି । ଚଳଚ୍ଚିତ୍ରରେ ସମସ୍ତେ ଦମଦାର ଅଭିନୟ କରିଥିବାବେଳେ ଫିଲ୍ମରେ ନଜର ଆସୁଥିବା କିଛି ଦୃଶ୍ୟ ଦର୍ଶକଙ୍କ ଲୋମ ଟାଙ୍କୁରି ଦେଇଛି । ଫିଲ୍ମର ସୁଟିଂ କେନ୍ଦୁଝର ଜିଲ୍ଲା ଆନନ୍ଦପୁର ସୀମାନ୍ତ ଠାକୁରମୁଣ୍ଡା ବ୍ଲକ୍ ଧାତିକିଡିହା ପଞ୍ଚାୟତ ଲୁଣିଖିଆ ଗାଁର ସନାତନ ପିଙ୍ଗୁଆଙ୍କ ପୁଅ କୃଷ୍ଣଚନ୍ଦ୍ର ପିଙ୍ଗୁଆଙ୍କ ଘରେ ହୋଇଥିଲା । ତେବେ ସୁଟିଂ ସମୟରେ ଘରର ଅନେକ ଆସବାବପତ୍ର ଭାଙ୍ଗିଯାଇଥିଲା । ଏପରିକି ଘରର ଟାଇଲ ମଧ୍ୟ ଭାଙ୍ଗିଯାଇଥିବା ଘର ମାଲିକ କୃଷ୍ଣଚନ୍ଦ୍ର ଅଭିଯୋଗ ଆଣିଛନ୍ତି ।

କୃଷ୍ଣଚନ୍ଦ୍ରଙ୍କ ଅଭିଯୋଗ ଅନୁସାରେ ସୁଟିଂ ସରିଲେ ତାଙ୍କ ଘର ମରାମତି ଏବଂ ରଙ୍ଗ କରିବାକୁ ପ୍ରତିଶ୍ରୁତି ଦିଆଯାଇଥିଲା । କିନ୍ତୁ ଫିଲ୍ମର ସୁଟିଂ ସରିବାପରେ ନିର୍ମାତା ଓ କଳାକାରମାନେ ନିଜ ନିଜ ବାଟରେ ଫେରିଯାଇଥିଲେ । ଲୁଣିଖିଆ ଗାଁରେ ଦୀର୍ଘ ୨ ମାସ ଧରି ସୁଟିଂ ହୋଇଥିବାବେଳେ ଅଧିକାଂଶ ସିନ୍ କୃଷ୍ଣଚନ୍ଦ୍ରଙ୍କ ଘରେ ସୁଟ୍ ହୋଇଥିଲା । ସୁଟିଂ ନ ସରିବା ପର୍ଯ୍ୟନ୍ତ ସେ ଏବଂ ତାଙ୍କ ପତ୍ନୀ କେବଳ ଗୋଟିଏ ଘରେ ବସବାସ କରିଥିଲେ । ଅନ୍ୟ ସମସ୍ତ ବଖରାରେ ସୁଟିଂ ଚାଲିଥିଲା । ଫିଲ୍ମର ଏକ ସିନ୍ ଅନୁସାରେ ଭୂତ ରାଗିଯାଇ ଅପରାଜିତାଙ୍କୁ ଚାହୁଁଛି ଏବଂ ସେହି ସମୟରେ ଘରର ସମସ୍ତ ସାମଗ୍ରୀ ମନକୁ ମନ ଭାଙ୍ଗିଯାଉଛି । କୃଷ୍ଣଚନ୍ଦ୍ରଙ୍କୁ ଏ ବାବଦରେ ସମସ୍ତ କ୍ଷତିପୂରଣ ଦିଆଯିବାକୁ ପ୍ରତିଶ୍ରୁତି ଦିଆଯାଇଥିବା ସେ କହିଛନ୍ତି । କିନ୍ତୁ ପୂର୍ବ ପ୍ରତିଶ୍ରୁତି ଅନୁସାରେ ଘର ମରାମତି କିମ୍ବା ରଙ୍ଗ କରିବାକୁ ପଇସା ଦେଇନଥିବା କୃଷ୍ଣଚନ୍ଦ୍ର ଦୁଃଖର ସହ ପ୍ରକାଶ କରିଛନ୍ତି ।  

ଏଭଳି ଘଟଣା ସିନେମା ଦୁନିଆରେ କିଛି ନୂଆ ନୂହେଁ । ପୂର୍ବରୁ ଓଡ଼ିଆ ସିନେମା ମାଲ୍ୟଗିରି ପ୍ରଯୋଜନା ସଂସ୍ଥା ନାଁରେ ସମାନ ଅଭିଯୋଗ ଆସିଥିଲା । ମାତ୍ର ପ୍ରଯୋଜନା ସଂସ୍ଥା ପକ୍ଷରୁ ଏହାର ଜବାବ ଦିଆଯାଇଥିଲା । କିନ୍ତୁ ‘ବୋଉ ବୁଟୁ ଭୂତ’ କ୍ଷେତ୍ରରେ ଟିକେ ଅଲଗା । ପ୍ରଯୋଜନା ଟିମ୍ ପକ୍ଷରୁ ଏବେ କୃଷ୍ଣଚନ୍ଦ୍ରଙ୍କ ଫୋନ୍ ଉଠାଉନାହାନ୍ତି । ଯାହାକୁ ନେଇ ସେ କ୍ଷୋଭ ପ୍ରକାଶ କରିଛନ୍ତି ।