ହୋଟେଲରେ ପଶି ଆକ୍ରମଣ କରି ଲୁଟି ନେଲେ ଟଙ୍କା, ଅଭିଯୁକ୍ତ ଗିରଫ

ଭୁବନେଶ୍ବର,୨୫/୪ : ହୋଟେଲର ମାଲିକଙ୍କୁ ଆକ୍ରମଣ କରିବା ପଡ଼ିଲା ମହଙ୍ଗା । ନୟାପଲ୍ଲୀ ଥାନା ପୁଲିସ ଘଟଣାର ତଦନ୍ତ କରିବା ସହ ଅଭିଯୁକ୍ତ ସିପୁ ଓରଫ ଶ୍ରୀକାନ୍ତ ପରିଡାକୁ ଗିରଫ କରି କୋର୍ଟ ଚାଲାଣ କରିଛି । 

ସୂଚନା ଅନୁସାରେ, ନୟାପଲ୍ଲୀ, ବେହେରା ସାହିସ୍ଥିତ ଶୁଭଲକ୍ଷ୍ମୀ ହୋଟେଲର ମାଲିକ ସୁରେଶ କୁମାର ବେହେରାଙ୍କ ଅଭିଯୋଗ ମୁତାବକ, ଗତ ୦୨.୦୯.୨୦୨୦ ଦିନ ୧୨.୫୦ ସମୟରେ ପ୍ରାୟ ୧୦ ଜଣ ଦୁର୍ବୁତ୍ତ, ମୁଖ୍ୟତଃ- କାନ୍ହା ମାଝୀ, ନୟାପଲ୍ଲୀର ଗଡ଼ସାହିର କାର୍ତ୍ତିକ ମାଝୀ, ଭୁବନ ମହାନ୍ତି, ଅନିକେତ ବଳବନ୍ତରାୟ, ଦଧି ଏବଂ ଟନି କଟୁରୀ, ଭୁଜାଲି, ଖଣ୍ଡା ଭଳି ମାରାତ୍ମକ ଅସ୍ତ୍ରଶସ୍ତ୍ର ଧରି ନୟାପଲ୍ଲୀ ଯୁବ ପରିଷଦ ଛକରୁ ନୟାପଲ୍ଲୀ ବେହେରାସାହି ଅଭିମୁଖେ ଆସିଥିଲେ ଏବଂ ତାଙ୍କ ହୋଟେଲର ମୁଖ୍ୟ ଦ୍ୱାର ଭାଙ୍ଗି ତାଙ୍କ ହୋଟେଲକୁ କ୍ଷତି ପହଞ୍ଚାଇଥିଲେ ଏବଂ ତାଙ୍କ କର୍ମଚାରୀ ମାନଙ୍କୁ ହତ୍ୟା କରିବା ଉଦ୍ଦେଶ୍ୟରେ ଆକ୍ରମଣ କରିଥିଲେ । କିନ୍ତୁ ସୌଭାଗ୍ୟବଶତଃ ସେମାନେ ସେମାନଙ୍କ ଜୀବନ ବଞ୍ଚାଇଥିଲେ । ଅଭିଯୁକ୍ତ ମାନେ ଚେୟାର, ଟେବୁଲ, ବାସନକୁସନ, ପଙ୍ଖା ଇତ୍ୟାଦି ଭାଙ୍ଗି ଦେଇଥିଲେ ଏବଂ ଅସଭ୍ୟ ଭାଷା ବ୍ୟବହାର କରି ଧମକ ଦେଇଥିଲେ । ଏହା ସହିତ ସେମାନେ ଭୟଙ୍କର ପରିଣାମ ଦେବାକୁ ଧମକ ଦେଇଥିଲେ ଏବଂ ତାଙ୍କ କ୍ୟାସ୍ କାଉଣ୍ଟରରୁ ୨୭୦୦ ଟଙ୍କା ନେଇଯାଇଥିଲେ ।

ଏହି ସମୟରେ ସେମାନେ ଏନଜେପିରୁ ବେହେରାସାହି ଛକକୁ ଆସିବା ସମୟରେ ସେମାନଙ୍କ ଘର ସମୁଖରେ ପାର୍କିଂ ହୋଇଥିବା ଗାଡ଼ିଗୁଡ଼ିକର କାଚ ଭାଙ୍ଗି ଦେଇଥିଲେ । ଯଥା: ରଞ୍ଜନ ଚୌଧୁରୀଙ୍କ ସ୍କର୍ପିଓ, ଲଲାଟେନ୍ଦୁ ପତିଙ୍କ ୱାଗନ୍, ବିଷ୍ଣୁ ପ୍ରସାଦ ସାହୁଙ୍କ ହୁଣ୍ଡାଇ ଇଅନ, ଟି.କେ. ବରାଳଙ୍କ ମାରୁତି ସେଲେରିଓ ଏବଂ ଟୁଟୁ ସାହୁଙ୍କ ଟାଟା ଏସି ଗାଡି । ଦୁର୍ବୁତ୍ତ ମାନେ ବେହେରା ସାହି ଛକରୁ ସ୍ଥାନୀୟ ଲୋକଙ୍କୁ ଧମକ ଦେଇ ଏନଜେପି ଛକ ଆଡ଼କୁ ଫେରୁଥିବା ବେଳେ, ସୁଶାନ୍ତ ବେହେରା, ସଞ୍ଜୟ ମହାନ୍ତି, ବିଷ୍ଣୁ ପ୍ରସାଦ ସାହୁ ବାହାରକୁ ଆସି ସେମାନଙ୍କୁ ପିଛା କରିବାକୁ ଚେଷ୍ଟା କରିଥିଲେ, କିନ୍ତୁ ଦୁର୍ବୁତ୍ତ ମାନେ କଟୁରୀ ଏବଂ ଧାରୁଆ ଅସ୍ତ୍ରଶସ୍ତ୍ର ସାହାଯ୍ୟରେ ସେମାନଙ୍କୁ ଆକ୍ରମଣ କରିଥିଲେ । ଯେତେବେଳେ ଅନ୍ୟ ସ୍ଥାନୀୟ ବ୍ୟକ୍ତି ସେଠାରେ ଏକାଠି ହେଲେ, ସେମାନେ ଘଟଣାସ୍ଥଳରୁ ଦୌଡ଼ି ପଳାଇ ଯାଇଥିଲେ । ସେମାନେ ବେହେରାସାହି ଛକରେ ଥିବା ଅନ୍ୟ କିଛି ଦୋକାନକୁ ମଧ୍ୟ କ୍ଷତି ପହଞ୍ଚାଇଥିଲେ ।

ତଦନ୍ତ ସମୟରେ ପୁଲିସ ପୂର୍ବରୁ ଭୁବନ ମହାନ୍ତି, ହରିପ୍ରସାଦ ନାୟକ, ଚିନୁ ଓରଫ ଅନିକେତ ବଳବନ୍ତରାୟ ଏବଂ ଏଣ୍ଡୁ ଓରଫ ସତ୍ୟବ୍ରତ ଖୁଣ୍ଟିଆ ନାମକ ୪ଜଣ ଅଭିଯୁକ୍ତଙ୍କୁ ଗତ ୦୪.୦୯.୨୦୨୦ ରେ ଗିରଫ କରି କୋର୍ଟ ଚାଲାଣ କରିଥିବା ବେଳେ, ସେମାନଙ୍କ ହେପାଜତରୁ ବିଭିନ୍ନ ମରଣାସ୍ତ୍ର ମଧ୍ୟ ଜବତ କରିଥିଲେ । ଏହି ମାମଲାର ଅଧିକ ତଦନ୍ତ ଚାଲିଥିବା ବେଳେ, ଅନ୍ୟ ଜଣେ ଅଭିଯୁକ୍ତ ସିପୁ ଓରଫ ଶ୍ରୀକାନ୍ତ ପରିଡାଙ୍କୁ ପୁଲିସ ଆଜି ଆଇଆରସି ଭିଲେଜ ସ୍ଥିତ କେସିସି ଫିଲ୍ଡ ନିକଟରୁ କାବୁ କରିବାରେ ସକ୍ଷମ ହୋଇଥିଲେ । ପଚରାଉଚରା ବେଳେ ସେ ନିଜ ଅପରାଧ ସ୍ଵୀକାର କରିଥିଲା । ଏହି ମାମଲାର ଅଧିକ ତଦନ୍ତ ଜାରି ରହିଛି ।