ନୂଆଦିଲ୍ଲୀ,୩୦/୬ : ଭାରତୀୟ ସ୍ଥଳସେନାର ନୂଆ ମୁଖ୍ୟ ଭାବେ ଲେଫ୍ଟନାଣ୍ଟ ଜେନେରାଲ୍ ଧୀରଜ ସେଠ୍ ଦାୟିତ୍ୱ ଗ୍ରହଣ କରିଛନ୍ତି। ଜେନେରାଲ୍ ଉପେନ୍ଦ୍ର ଦ୍ୱିବେଦୀ ଅବସର ଗ୍ରହଣ କରିବା ପରେ କେନ୍ଦ୍ର ସରକାର ଧୀରଜ ସେଠଙ୍କୁ ଭାରତୀୟ ସ୍ଥଳସେନା ମୁଖ୍ୟ ଭାବେ ନିଯୁକ୍ତ କରିଛନ୍ତି। ସେ ଜୁନ୍ ୩୦ରୁ ୨୦୨୮ ଅଗଷ୍ଟ ୩୧ ପର୍ଯ୍ୟନ୍ତ ଏହି ପଦରେ କାର୍ଯ୍ୟଭାର ସମ୍ଭାଳିବେ।ଦାୟିତ୍ୱ ଗ୍ରହଣ ପୂର୍ବରୁ ଧୀରଜ ସେଠ୍ ଭାରତୀୟ ସେନାର ଉପାଧ୍ୟକ୍ଷ ଭାବେ କାର୍ଯ୍ୟରତ ଥିଲେ। ସେ ଚଳିତ ବର୍ଷ ଏପ୍ରିଲ୍ ୧ ତାରିଖରେ ସେନା ଉପାଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ କରିଥିଲେ।ଲେଫ୍ଟନାଣ୍ଟ ଜେନେରାଲ୍ ଧୀରଜ ସେଠ୍ ଜାତୀୟ ପ୍ରତିରକ୍ଷା ଏକାଡେମୀ (ଏନ୍ଡିଏ), ଖଡକୱାସଲାର ପୂର୍ବତନ ଛାତ୍ର।
ତାଙ୍କୁ ଡିସେମ୍ବର ୧୯୮୬ରେ ଆର୍ମର୍ଡ କୋରରେ କମିଶନ ପ୍ରଦାନ କରାଯାଇଥିଲା। ପ୍ରାୟ ଚାରି ଦଶନ୍ଧି ଧରି ସେ ବିଭିନ୍ନ ଭୂଖଣ୍ଡ ଓ ସଂଘର୍ଷପୂର୍ଣ୍ଣ ଅଞ୍ଚଳରେ ଦେଶସେବା କରି ଆସିଛନ୍ତି।ନିଜର ଦୀର୍ଘ ସାମରିକ କ୍ୟାରିୟରରେ ଧୀରଜ ସେଠ୍ ମରୁଭୂମି ସେକ୍ଟରରେ ଏକ ଆର୍ମର୍ଡ ରେଜିମେଣ୍ଟର ନେତୃତ୍ୱ ନେଇଥିବା ବେଳେ ପଟିଆଲାସ୍ଥିତ ୯୮ ଆର୍ମର୍ଡ ବ୍ରିଗେଡର କମାଣ୍ଡ ମଧ୍ୟ କରିଛନ୍ତି। ଏହାଛଡ଼ା ଜମ୍ମୁ ଓ କାଶ୍ମୀରରେ ବିଦ୍ରୋହ ବିରୋଧୀ ଅଭିଯାନରେ ନିୟୋଜିତ ଡିଭିଜନ ସ୍ତରୀୟ ‘ୟୁନିଫର୍ମ ଫୋର୍ସ’ର ନେତୃତ୍ୱ ମଧ୍ୟ ସେ ସଫଳତାର ସହ ତୁଲାଇଛନ୍ତି।
Leave a Reply