ଭୁବନେଶ୍ୱର, ୨୩/୯: ଆଜି ଭାଦ୍ରବ ଶୁକ୍ଳ ଦ୍ୱାଦଶୀ ତିଥିରେ ଶ୍ରୀମନ୍ଦିରରେ ପାଳିତ ହେବ ବାମନ ଜନ୍ମ ନୀତି। ବିଷ୍ଣୁଙ୍କ ପଞ୍ଚମ ଅବତାର ବାମନଙ୍କ ଜନ୍ମ ଉପଲକ୍ଷେ ଗୁପ୍ତ ନୀତି ଅନୁଷ୍ଠିତ ହେବ | ଏହି ନୀତିକୁ ଦୃଷ୍ଟିରେ ରଖି ଅପରାହ୍ନ ୫ଟାରୁ ରାତି ୧୧ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ। ମଧ୍ୟାହ୍ନ ଧୂପ ନୀତି ପରେ ଏହି କଟକଣା ଲାଗୁ ହେବ ଏବଂ ରାତି ୧୧ଟା ପର୍ଯ୍ୟନ୍ତ ବଳବତ୍ତର ରହିବ। ତେଣୁ ଭକ୍ତମାନଙ୍କୁ ସେହି ଅନୁଯାୟୀ ନିଜର ଦର୍ଶନ ଯୋଜନା କରିବାକୁ ପରାମର୍ଶ ଦିଆଯାଇଛି। ମଧ୍ୟାହ୍ନ ଧୂପ ଉଠିବା ପରେ ଜୟବିଜୟ ଦ୍ୱାର ବନ୍ଦ ହୋଇ ଭିତର ଚନ୍ଦନ ଅର୍ଗଳିରେ ପୂଜାପଣ୍ଡା ପଞ୍ଚବର୍ଣ୍ଣ ମୁରୁଜରେ ମଣ୍ଡଳ ଅଙ୍କନ ହେବ।
ଭାଦ୍ରବ ଶୁକ୍ଳ ଦ୍ୱାଦଶୀ ତିଥିକୁ ଭଗବାନ ବିଷ୍ଣୁଙ୍କ ପଞ୍ଚମ ଅବତାର ‘ବାମନ’ଙ୍କ ଆବିର୍ଭାବ ଦିବସ ଭାବେ ପାଳନ କରାଯାଏ। ଏହି ଦିନଟି ‘ବାମନ ଜନ୍ମ’ କିମ୍ବା ‘ବାମନ ଦ୍ୱାଦଶୀ’ ଭାବେ ମଧ୍ୟ ଜଣାଶୁଣା ଏବଂ ହିନ୍ଦୁ ଧାର୍ମିକ ପରମ୍ପରାରେ ଏହାର ବିଶେଷ ଗୁରୁତ୍ୱ ରହିଛି।
ଏହି ଉତ୍ସବ ଅବସରରେ ଶ୍ରୀମନ୍ଦିରରେ ସ୍ୱତନ୍ତ୍ର ନୀତିକାନ୍ତି ଅନୁଷ୍ଠିତ ହେବ। ପରମ୍ପରା ଅନୁଯାୟୀ, ଭାଦ୍ରବ ଶୁକ୍ଳ ଦ୍ୱାଦଶୀ ଦିନ ମଧ୍ୟାହ୍ନ ସମୟରେ ଭଗବାନ ଜଗନ୍ନାଥଙ୍କ ବାମନ ରୂପର ଆବିର୍ଭାବ ଲୀଳା ପାଳନ କରାଯାଇଥାଏ । ଶ୍ରୀରାମ ଜନ୍ମ ଓ ଶ୍ରୀକୃଷ୍ଣ ଜନ୍ମ ନୀତି ଭଳି, ଶ୍ରୀମନ୍ଦିରରେ ବାମନ ଜନ୍ମ ନୀତି ମଧ୍ୟ ନିର୍ଦ୍ଦିଷ୍ଟ ପାରମ୍ପରିକ ରୀତିନୀତି ଓ ପ୍ରଥା ଅନୁସାରେ ସମ୍ପନ୍ନ କରାଯାଏ।
ତିନି ବାଡ଼ରେ ବନ୍ଦାପନା ପରେ କଳସ ବରୁଣ ପୂଜା ସମ୍ପନ୍ନ ହୋବ। ପତିମହାପାତ୍ର ଓ ମୁଦିରସ୍ତ ଥାଇ ଆଚାର୍ଯ୍ୟ ବରଣ ହୋଇ ଦକ୍ଷିଣ ଘରେ ଭୋଗ ଶେଷ ପରେ କୃଷ୍ଣ (ବାମନ)ଙ୍କୁ ଭିତର ସିଂହାସନକୁ ବିଜେ କରାଯିବ । ମୁଦିରସ୍ତ ଶ୍ରୀଅଙ୍ଗରେ ଧଣ୍ଡିପ୍ରସାଦ ଲାଗି କରିବା ପରେ କୃଷ୍ଣଙ୍କୁ ସର୍ବତ୍ର ଭଦମଣ୍ଡଳ ଉପରେ ବିଜେ କରାଯିବ । ଏକ କ୍ଷୁଦ୍ରାକୃତି ସୁବର୍ଣ୍ଣ ବାମନ ପ୍ରତିମାଙ୍କୁ ପଞ୍ଚାମୃତରେ ମହାସ୍ନାନ କରି ଶୀତଳ ଭୋଗ କରାଯାଇ ଗର୍ଭ ଉଦକ ଲାଗି ପଞ୍ଚ ଉପଚାରରେ ପୂଜା କରାଯିବ । ଖଣ୍ଡୁଆ ଘୋଡ଼ାଇ ଜନ୍ମବିଧି ନୀତି ସମ୍ପନ୍ନ ହେବ ।
ସେପଟେ ଶ୍ରୀନଅରରେ ମହାପ୍ରଭୁଙ୍କ ଆଦ୍ୟ ସେବକଙ୍କ ଆଉ ଗୋଟିଏ ବର୍ଷ ରାଜତ୍ୱର ଅଙ୍କ କଟା ହେବ । ରାଜକୀୟ ନବବର୍ଷର ଆରମ୍ଭ ସହ ଶ୍ରୀନଅରରେ ପାଳନ ହେବ ସୁନିଆଁ ଉତ୍ସବ । ଗଜପତି ମହାରାଜାଙ୍କ ଶାସନର ନୂଆ ଅଙ୍କ ଓ ନୂଆ ବର୍ଷ ଆଜି ଠାରୁ ଆରମ୍ଭ ହେବ । ଗଜପତିଙ୍କ ଅଭିଷେକ ଶାସନର ୭୧ ଅଙ୍କ ଓ ୧୪୩୪ ସାଲ୍ ଆଜି ଠାରୁ ଆରମ୍ଭ ହେବ । ଗଜପତି ମହାରାଜାଙ୍କ ନାମ ସହ ନୂଆ ସାଲ ଓ ନୂଆ ଅଙ୍କ ଉଲ୍ଲେଖ ଥିବା ସୁବର୍ଣ୍ଣ ମୁଦ୍ରା ଆଜି ଠାରୁ ପ୍ରଚଳିତ ହେବ । ପାରିଷଦ ବର୍ଗ ଏହି ଅବସରରେ ଗଜପତି ମହାରାଜଙ୍କୁ ସୁନିଆଁ ଭେଟି ଦେବେ ।
Leave a Reply