ଭୁବନେଶ୍ଵର,୨୯/୯: ଆଜିର ଦ୍ରୁତ ଗତିଶୀଳ ଜୀବନଯାତ୍ରା ଓ ଅସ୍ୱାସ୍ଥ୍ୟକର ଖାଦ୍ୟପେୟ ଯୋଗୁଁ ଆମର ଜୀବନଶୈଳୀରେ ବହୁତ ପରିବର୍ତ୍ତନ ଆସିଛି, ଏହି ପରିବର୍ତ୍ତନ ସବୁଠାରୁ ବଡ଼ ପ୍ରଭାବ ପକାଉଛି ଆମର ସବୁଠାରୁ ସମ୍ବେଦନଶୀଳ ଅଙ୍ଗ ହୃତପିଣ୍ଡ ଉପରେ, ହୃଦଘାତ ଓ ହୃଦରୋଗ ସମସ୍ୟା ଦିନକୁ ଦିନ ବୃଦ୍ଧି ପାଉଥିବାରୁ ଏହା ବିଷୟରେ ସଚେତନତା ସୃଷ୍ଟି କରିବା ପାଇଁ ପ୍ରତିବର୍ଷ ସେପ୍ଟେମ୍ବର ୨୯ ତାରିଖକୁ “ବିଶ୍ୱ ହୃତପିଣ୍ଡ” ଦିବସ ଭାବରେ ପାଳନ କରାଯାଉଛି ।
ଏହି ଦିବସ ଅବସରରେ ପ୍ରତିବର୍ଷ ପରି ଏ ବର୍ଷ ମଧ୍ୟ ଓଡ଼ିଶା ରାଜ୍ୟ ଭାରତ ସ୍କାଉଟ୍ସ ଏବଂ ଗାଇଡ୍ସ ଏବଂ ଗ୍ୟାଙ୍ଗ୍ସ ଏବଂ ଲିଡର କେୟାର ଫାଉଣ୍ଡେସନ ପକ୍ଷରୁ ସକାଳ ୯.୩୦ ମିନିଟ୍ ସମୟରେ ରାଜ୍ୟ ମୁଖ୍ୟାଳୟ ପରିସରରେ ଏକ ସଭା ଅନୁଷ୍ଠିତ ହୋଇଯାଇଛି, ଏହି ସଭା ଓଡ଼ିଶା ରାଜ୍ୟ ଭାରତ ସ୍କାଉଟ୍ସ ଏବଂ ଗାଇଡ୍ସର ସଭାପତି ଶ୍ରୀଯୁକ୍ତ ଅତନୁ ସବ୍ୟସାଚୀ ନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବେଳେ ଅତିଥି ଭାବରେ ସ୍ୱାସ୍ଥ୍ୟ ଏବଂ ଲିଡର କେୟାର ଫାଉଣ୍ଡେସନର ନିର୍ଦ୍ଦେଶକ ତଥା ବିଶିଷ୍ଟ ଡାକ୍ତର ଶ୍ରୀ ମନୋଜ କୁମାର ସାହୁ ପ୍ରମୁଖ ଉପସ୍ଥିତ ଥିଲେ ।
ଶ୍ରୀ ନାୟକ ଆଜି ଦିବସର ମହତ୍ତ୍ୱ ବିଷୟରେ ବର୍ଣ୍ଣନା କରିବା ବେଳେ ଶ୍ରୀଯୁକ୍ତ ସାହୁ ହୃତପିଣ୍ଡକୁ କିପରି ସୁସ୍ଥ ରଖିପାରିବା ସେ ବିଷୟରେ ପରାମର୍ଶ ଦେଇଥିଲେ । ଏହି ଅବସରରେ “ସୁସ୍ଥ ହୃତପିଣ୍ଡ” ଉପରେ ଏକ ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହେବା ସହ ଏକ ସଚେତନତା ରାଲି କରାଯାଇଥିଲା ।
ଓଡ଼ିଶା ରାଜ୍ୟ ଭାରତ ସ୍କାଉଟ୍ସ ଏବଂ ଗାଇଡ୍ସର ଯୁଗ୍ମ ସମ୍ପାଦିକା ଶ୍ରୀମତୀ ଅନାମିକା ଦାସ ସ୍ୱାଗତ ପରିଭାଷଣ କରୁଥିବା ବେଳେ ସମ୍ପାଦକ ଶ୍ରୀ ଶରତ ଚନ୍ଦ୍ର ପାତ୍ରକରାୟ ଧନ୍ୟବାଦ ଅର୍ପଣ କରିଥିଲେ । ଶେଷରେ ଚିତ୍ରାଙ୍କନ ପ୍ରତିଯୋଗିତାରେ କୃତକାର୍ଯ୍ୟ ହୋଇଥିବା ପିଲାମାନଙ୍କୁ ପୁରସ୍କାର ପ୍ରଦାନ କରି ସମ୍ମାନିତ କରାଯାଇଥିଲା ।
Leave a Reply