– ୧ ଲକ୍ଷ କୋଟି ଟଙ୍କାର ନିବେଶ ଦ୍ୱାରା ୩ ଲକ୍ଷରୁ ଅଧିକ ନିଯୁକ୍ତି ସୃଷ୍ଟି ହେବାର ଆଶା: ଅନନ୍ତ ଅମ୍ବାନୀ
– ଚାଷୀମାନେ ନିଜ କ୍ଷେତର ସିଇଓ ହେବେ; ସେମାନଙ୍କୁ ଅନ୍ନଦାତାରୁ ଊର୍ଜାଦାତା ଭାବେ ପରିବର୍ତ୍ତନ କରିବା ଉପରେ ଗୁରୁତ୍ୱ
ଭୁବନେଶ୍ୱର/ନୂଆଦିଲ୍ଲୀ, ୩/୧୦:: ରିଲାଏନ୍ସ ଇଣ୍ଡଷ୍ଟ୍ରିଜ୍ ଆନ୍ଧ୍ରପ୍ରଦେଶର ଗ୍ରୀନ୍ ଏନର୍ଜି କ୍ଷେତ୍ରରେ ୧ ଲକ୍ଷ କୋଟି ଟଙ୍କା ନିବେଶ କରିବ। ଏହି ପଦକ୍ଷେପ ଅଧୀନରେ ରାଜ୍ୟବ୍ୟାପୀ କମ୍ପ୍ରେସଡ୍ ବାୟୋଗ୍ୟାସ୍ (ସିବିଜି) ପ୍ଲାଣ୍ଟ ସ୍ଥାପନ କରାଯିବ। ରିଲାଏନ୍ସ ଇଣ୍ଡଷ୍ଟ୍ରିଜର କାର୍ଯ୍ୟନିର୍ବାହୀ ନିର୍ଦ୍ଦେଶକ ଅନନ୍ତ ଅମ୍ବାନୀ କହିଛନ୍ତି ଯେ ଏହି ନିବେଶ ଦ୍ୱାରା ୩ ଲକ୍ଷରୁ ଅଧିକ ନିଯୁକ୍ତି ସୃଷ୍ଟି ହେବ ଏବଂ ଆଗାମୀ ଦଶନ୍ଧିଗୁଡ଼ିକରେ ରାଜ୍ୟ ପାଇଁ ପ୍ରାୟ ୬୦,୦୦୦ କୋଟି ଟଙ୍କାର ରାଜସ୍ୱ ଉପାର୍ଜିତ ହେବ।
ଅନନ୍ତ ଅମ୍ବାନୀ ଏହି ନିବେଶକୁ କୃଷକ ସମୁଦାୟ ଏବଂ ଦେଶର ଶକ୍ତି ଆବଶ୍ୟକତା ସହିତ ଯୋଡ଼ିଛନ୍ତି। ସେ କହିଛନ୍ତି ଯେ ଯେଉଁ ଚାଷୀମାନେ ବର୍ତ୍ତମାନ ଭାରତର ଖାଦ୍ୟ ସୁରକ୍ଷାକୁ ସୁଦୃଢ଼ କରୁଛନ୍ତି, ସେମାନେ ଦେଶର ଭବିଷ୍ୟତ ଶକ୍ତି ସୁରକ୍ଷାରେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବେ। ସେ ଏହାକୁ ଚାଷୀମାନଙ୍କୁ ଅନ୍ନଦାତା ରୁ ଊର୍ଜାଦାତା (ଶକ୍ତି ଯୋଗାଣକାରୀ) ରେ ପରିଣତ କରିବା ଦିଗରେ ଏକ ପଦକ୍ଷେପ ବୋଲି ବର୍ଣ୍ଣନା କରିଥିଲେ।
ମଦନପଲ୍ଲୀ ଠାରେ ଆୟୋଜିତ ରାୟଲସୀମା ହର୍ଟିକଲଚର ହବ୍ ଏବଂ ଇଣ୍ଡିଆନ୍ ସ୍କୁଲ୍ ଅଫ୍ ଏଗ୍ରିକଲଚର ର ଭିତ୍ତିପ୍ରସ୍ତର ସ୍ଥାପନ ଉତ୍ସବରେ ସେ ଉଦ୍ବୋଧନ ଦେଇ ଏହା କହିଛନ୍ତି। ଏହି କାର୍ଯ୍ୟକ୍ରମରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ, ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ, ଉପ-ମୁଖ୍ୟମନ୍ତ୍ରୀ ପୱନ କଲ୍ୟାଣ, ନାରା ଲୋକେଶଙ୍କ ସମେତ ଅନ୍ୟ ମନ୍ତ୍ରୀଗଣ ଓ ଜନପ୍ରତିନିଧି ଉପସ୍ଥିତ ଥିଲେ।
ଅନନ୍ତ କହିଛନ୍ତି ଯେ, କ୍ଷେତରେ ଏଆଇ, ଦ୍ରୋନ, ରୋବଟିକ୍ସ ଏବଂ ନୂଆ ଜ୍ଞାନକୌଶଳ ବ୍ୟବହାର ଦ୍ୱାରା ଚାଷୀମାନଙ୍କୁ ଲାଭ ମିଳିପାରିବ। ସେ ଆହୁରି କହିଛନ୍ତି ଯେ ଜିଓ ପକ୍ଷରୁ ଇଣ୍ଡିଆନ୍ ସ୍କୁଲ୍ ଅଫ୍ ଏଗ୍ରିକଲଚରର ଟ୍ରେନିଙ୍ଗ ମଡ୍ୟୁଲଗୁଡିକୁ ଭାରତୀୟ ଭାଷା ଗୁଡିକରେ ଭର୍ଚୁଆଲ କ୍ଲାସରୁମ ମାଧ୍ୟମରେ ଲକ୍ଷ ଲକ୍ଷ କୃଷକଙ୍କ ନିକଟରେ ପହଞ୍ଚାଇବାରେ ସହାୟତା କରାଯିବ। ଜିଓ କୃଷି ପ୍ଲାଟଫର୍ମର ଜ୍ଞାନକୌଶଳକୁ ମଧ୍ୟ କୃଷକମାନଙ୍କ କାମ ପାଇଁ ଉପଯୋଗ ନେଇ ସେ ଉଲ୍ଲେଖ କରିଥିଲେ।
ଏଥିସହିତ ସେ କହିଥିଲେ ଯେ “ଭାରତ ବିଶ୍ୱକୁ ଅନେକ ସିଇଓ ପ୍ରଦାନ କରିଛି; ଏବେ ଆମକୁ କୃଷକମାନଙ୍କୁ ସେମାନଙ୍କ ନିଜ କ୍ଷେତର ସିଇଓ କରିବାକୁ ହେବ।” ସେ କୃଷିକୁ ଏପରି ଏକ ବୃତ୍ତିଗତ ଓ ସମ୍ମାନଜନକ ଜୀବିକାରେ ପରିଣତ କରିବା ଉପରେ ଗୁରୁତ୍ୱାରୋପ କରିଥିଲେ, ଯାହାକୁ ଯୁବପିଢ଼ି ଗର୍ବର ସହ ବାଛିପାରିବେ। ସେ କହିଥିଲେ ଯେ ରିଲାଏନ୍ସ ରାଜ୍ୟ ସରକାର ଏବଂ ଚାଷୀମାନଙ୍କ ସହ ମିଳିତ ଭାବେ ଏହି ସହଭାଗିତାକୁ ଆଗକୁ ବଢ଼ାଇବ।
Leave a Reply