ନୀତା ଅମ୍ବାନୀଙ୍କ ଅନନ୍ୟ ପଦକ୍ଷେପ: ଦୃଷ୍ଟିବାଧିତଙ୍କ ପାଇଁ ଏଣିକି ପ୍ରତି ସପ୍ତାହରେ ପ୍ରକାଶ ପାଇବ ବ୍ରେଲ୍ ଖବରକାଗଜ

ଏନଏବି ଇଣ୍ଡିଆ ସହଯୋଗରେ ପ୍ରକାଶିତ ହିନ୍ଦୀ ଓ ମରାଠୀ ବ୍ରେଲ୍ ଖବରକାଗଜ ଏଣିକି ପାକ୍ଷିକ ପରିବର୍ତ୍ତେ ସାପ୍ତାହିକ ଭାବେ ପ୍ରକାଶ ପାଇବ

– ରିଲାଏନ୍ସ ଫାଉଣ୍ଡେସନର “ଦୃଷ୍ଟି” କାର୍ଯ୍ୟକ୍ରମ ମାଧ୍ୟମରେ ୨ ଲକ୍ଷରୁ ଅଧିକ ଲୋକ ଉପକୃତ; ଚକ୍ଷୁ ସ୍ୱାସ୍ଥ୍ୟ ଓ ସୂଚନାର ସୁଗମ ଉପଲବ୍ଧତା ଉପରେ ଗୁରୁତ୍ୱ

ମୁମ୍ବାଇ, ୧୪ ଅକ୍ଟୋବର ୨୦୨୬: ଦୃଷ୍ଟିବାଧିତ ବ୍ୟକ୍ତିମାନଙ୍କ ନିକଟରେ ଖବର ଓ ଜରୁରୀ ସୂଚନା ପହଞ୍ଚାଇବା ଉଦ୍ଦେଶ୍ୟରେ ରିଲାଏନ୍ସ ଫାଉଣ୍ଡେସନର “ଦୃଷ୍ଟି” କାର୍ଯ୍ୟକ୍ରମ ଅଧୀନରେ ପ୍ରକାଶିତ ହିନ୍ଦୀ ଓ ମରାଠୀ ବ୍ରେଲ୍ ଖବରକାଗଜ ଏଣିକି ପାକ୍ଷିକ ପରିବର୍ତ୍ତେ ସାପ୍ତାହିକ ଭାବେ ପ୍ରକାଶ ପାଇବ। ଅର୍ଥାତ୍‌, ପାଠକମାନେ ଏଣିକି ପ୍ରତି ସପ୍ତାହରେ ଦେଶ ଓ ବିଦେଶର ଖବର ପଢ଼ିବାର ସୁଯୋଗ ପାଇବେ। ରିଲାଏନ୍ସ ଫାଉଣ୍ଡେସନ ପକ୍ଷରୁ ନ୍ୟାସନାଲ୍ ଆସୋସିଏସନ୍ ଫର୍ ଦ ବ୍ଲାଇଣ୍ଡ (ଏନଏବି) ଇଣ୍ଡିଆ ସହଯୋଗରେ ଏହି ଖବରକାଗଜଗୁଡ଼ିକ ପ୍ରକାଶ କରାଯାଉଛି। ଏହି ଖବରକାଗଜର ପାଠକ ସଂଖ୍ୟା ୩୦ ହଜାରରୁ ଅଧିକ।

ରିଲାଏନ୍ସ ଫାଉଣ୍ଡେସନର ପ୍ରତିଷ୍ଠାତା ତଥା ଅଧ୍ୟକ୍ଷା ନୀତା ଏମ୍. ଅମ୍ବାନୀ ଦୃଷ୍ଟିବାଧିତ ବ୍ୟକ୍ତିମାନଙ୍କୁ ସହାୟତା ପ୍ରଦାନ କରିବା ସହ ସେମାନଙ୍କ ପାଇଁ ଉନ୍ନତ ସୁଯୋଗ ସୃଷ୍ଟି କରିବା ଲାଗି ନିରନ୍ତର ପ୍ରୟାସ କରିଆସୁଛନ୍ତି। ଚଳିତ ବର୍ଷ ଜାନୁୟାରୀରେ ମୁମ୍ବାଇଠାରେ ଏନଏବି ଇଣ୍ଡିଆର ୭୫ତମ ପ୍ରତିଷ୍ଠା ଦିବସ ସମାରୋହରେ ସେ ଫାଉଣ୍ଡେସନ ପକ୍ଷରୁ ୫ କୋଟି ଟଙ୍କାର ସହାୟତା ଘୋଷଣା କରିଥିଲେ। ବ୍ରେଲ୍ ଖବରକାଗଜର ସାପ୍ତାହିକ ପ୍ରକାଶନ ଏହି ପଦକ୍ଷେପର ଏକ ଅଂଶ। ଏହାଦ୍ୱାରା ଦୃଷ୍ଟିବାଧିତ ବ୍ୟକ୍ତିମାନେ ନିୟମିତ ଭାବେ ଖବର ଓ ଆବଶ୍ୟକ ସୂଚନା ପାଇପାରିବେ। ଏଥିସହ ସେମାନେ ଦେଶ ଓ ବିଶ୍ୱରେ ଘଟୁଥିବା ବିଭିନ୍ନ ଘଟଣା ସହ ଅଧିକ ଭଲ ଭାବେ ଯୋଡ଼ି ହୋଇପାରିବେ।

ରିଲାଏନ୍ସ ଫାଉଣ୍ଡେସନର “ଦୃଷ୍ଟି” କାର୍ଯ୍ୟକ୍ରମ ୨୦୦୩ ମସିହାରେ ଆରମ୍ଭ ହୋଇଥିଲା। ଆବଶ୍ୟକ କରୁଥିବା ଲୋକଙ୍କୁ ଉନ୍ନତ ଚକ୍ଷୁ ଚିକିତ୍ସା ଯୋଗାଇଦେବା ଏବଂ ଦୃଷ୍ଟିବାଧିତ ବ୍ୟକ୍ତିମାନଙ୍କ ଜୀବନକୁ ସହଜ କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ। ଏହି କାର୍ଯ୍ୟକ୍ରମ ଅଧୀନରେ ମାଗଣା ଚକ୍ଷୁ ପରୀକ୍ଷା, କର୍ଣ୍ଣିଆ ପ୍ରତିରୋପଣ ଏବଂ ଚଷମା ଯୋଗାଇଦେବା ଭଳି କାର୍ଯ୍ୟ କରାଯାଉଛି। ଏହି ସେବାଗୁଡ଼ିକ ପ୍ରଦାନ କରିବା ପାଇଁ ଫାଉଣ୍ଡେସନ ଏନଏବି ଇଣ୍ଡିଆ, ଶଙ୍କରା ଆଇ ଫାଉଣ୍ଡେସନ୍ ଏବଂ ଅରବିନ୍ଦ ଆଇ କେୟାର ସିଷ୍ଟମ୍ ସହ ସହଭାଗିତା ସ୍ଥାପନ କରିଛି।

ଫାଉଣ୍ଡେସନର ସୂଚନା ଅନୁଯାୟୀ, “ଦୃଷ୍ଟି” କାର୍ଯ୍ୟକ୍ରମ ମାଧ୍ୟମରେ ଏପର୍ଯ୍ୟନ୍ତ ୨ ଲକ୍ଷରୁ ଅଧିକ ଲୋକଙ୍କ ନିକଟରେ ସହାୟତା ପହଞ୍ଚିପାରିଛି। ଏହାଦ୍ୱାରା ୨୨,୫୦୦ରୁ ଅଧିକ ଲୋକଙ୍କ ଦୃଷ୍ଟିଶକ୍ତି ଫେରାଇ ଆଣିବାରେ ମଧ୍ୟ ସହାୟତା ମିଳିଛି। ଆବଶ୍ୟକ କରୁଥିବା ଲୋକଙ୍କୁ ଉନ୍ନତ ଚକ୍ଷୁ ଚିକିତ୍ସା ଯୋଗାଇଦେବା ସହ ଦୃଷ୍ଟିବାଧିତ ବ୍ୟକ୍ତିମାନଙ୍କୁ ଆତ୍ମବିଶ୍ୱାସର ସହ ଜୀବନଯାପନ କରିବାର ସୁଯୋଗ ଦେବା ଏହି ପ୍ରୟାସର ଲକ୍ଷ୍ୟ। ବ୍ରେଲ୍ ଖବରକାଗଜର ସାପ୍ତାହିକ ପ୍ରକାଶନ ଏହି ଉଦ୍ୟମକୁ ଆହୁରି ଆଗକୁ ନେବ। ଏହାଦ୍ୱାରା ପାଠକମାନେ ଖବର, ସାମ୍ପ୍ରତିକ ଘଟଣାବଳୀ ଏବଂ ସମାଜ ସମ୍ପର୍କିତ ସୂଚନା ଅଧିକ ନିୟମିତ ଭାବେ ପାଇପାରିବେ।