ନୂଆଦିଲ୍ଲୀ : ୨୦୨୭ରେ ହେବ ଉତ୍ତର ପ୍ରଦେଶ ବିଧାନସଭା ନିର୍ବାଚନ। ଏନେଇ ଆରମ୍ଭ ହୋଇଯାଇଛି ଅଙ୍କକଷା କଷି । ରାଜନୈତିକ ଦଳ ଗୁଡ଼ିକ ପକ୍ଷରୁ ଭୋଟ ବ୍ୟାଙ୍କ ହାତେଇବା ପାଇଁ ପ୍ରସ୍ତୁତି ଆରମ୍ଭ କରିସାରିଛନ୍ତି। ଏହି ପରିପ୍ରେକ୍ଷୀରେ, ସମାଜବାଦୀ ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ଅଖିଳେଶ ଯାଦବ ଏକ ନିର୍ବାଚନୀ ପଦକ୍ଷେପ ନେଇଛନ୍ତି । ଯାହା ସିଧାସଳଖ ସରକାରୀ କର୍ମଚାରୀ ଏବଂ ବିଭିନ୍ନ ଜାତି ଏବଂ ସାମାଜିକ ଗୋଷ୍ଠୀକୁ ପ୍ରଭାବିତ କରିବ।
ଅଖିଳେଶ ଯାଦବ ଘୋଷଣା କରିଛନ୍ତି ଯେ, ଯଦି ସମାଜବାଦୀ ପାର୍ଟି ୨୦୨୭ରେ ସରକାର ଗଠନ କରେ, ତେବେ ଅନେକ ମହାପୁରୁଷ ଏବଂ ଧାର୍ମିକ ଏବଂ ସାମାଜିକ ବ୍ୟକ୍ତିତ୍ୱଙ୍କ ଜନ୍ମ ବାର୍ଷିକୀରେ ସରକାରୀ ଛୁଟି ପୁନଃସ୍ଥାପିତ କରାଯିବ। ଏଥିରେ ସର୍ଦ୍ଦାର ବଲ୍ଲଭଭାଇ ପଟେଲ, ନିଷାଦରାଜ, ଭଗବାନ ପର୍ଶୁରାମ, ଅବନ୍ତିବାଇ ଲୋଧି, ସମ୍ରାଟ ଅଶୋକ ମୌର୍ଯ୍ୟ, ମହାରାଣା ପ୍ରତାପ ଏବଂ ବିଶ୍ୱକର୍ମାଙ୍କ ଜନ୍ମ ବାର୍ଷିକୀ ଅନ୍ତର୍ଭୁକ୍ତ। ଏହି ଅବସରରେ ୮ ଦିନ ଅତିରିକ୍ତ ସରକାରୀ ଛୁଟି ପ୍ରସ୍ତାବ ଦିଆଯାଇଛି।
ଅଖିଳେଶ ଯାଦବଙ୍କ ଦ୍ୱାରା ଉଲ୍ଲେଖ କରାଯାଇଥିବା ଛୁଟି ଗୁଡ଼ିକୁ ଯୋଗୀ ଆଦିତ୍ୟନାଥ ସରକାର ବାତିଲ କରିଥିଲେ। ଅଖିଳେଶ ଯାଦବଙ୍କ ଏହି ପଦକ୍ଷେପ ଜାତି ସମୀକରଣ ସହିତ ମଧ୍ୟ ଜଡିତ। ଏହାକୁ ବୁଝିବା ପାଇଁ, ଉତ୍ତର ପ୍ରଦେଶର ଜାତି ରାଜନୀତିକୁ ବୁଝିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଉତ୍ତର ପ୍ରଦେଶରେ ନିର୍ବାଚନ କେବଳ ଦଳଗୁଡ଼ିକ ମଧ୍ୟରେ ପ୍ରତିଯୋଗିତା ନୁହେଁ, ବରଂ ବିଭିନ୍ନ ଜାତି ଏବଂ ସାମାଜିକ ଗୋଷ୍ଠୀର ସମର୍ଥନ ମଧ୍ୟ ସରକାର ଗଠନ କରିବାରେ ପ୍ରମୁଖ ଭୂମିକା ଗ୍ରହଣ କରେ। ତେଣୁ, ବିଭିନ୍ନ ସମ୍ପ୍ରଦାୟର ମହାନ ବ୍ୟକ୍ତିତ୍ୱଙ୍କ ଜନ୍ମବାର୍ଷିକୀରେ ଛୁଟି ଘୋଷଣାକୁ ଏକକାଳୀନ ଅନେକ ଭୋଟ ବ୍ୟାଙ୍କ ପର୍ଯ୍ୟନ୍ତ ପହଞ୍ଚିବାର ପ୍ରୟାସ ଭାବରେ ଦେଖାଯାଇପାରେ।
ଆଗାମୀ ବିଧାନସଭା ନିର୍ବାଚନ ପାଇଁ ଉତ୍ତର ପ୍ରଦେଶରେ ସମାଜବାଦୀ ପାର୍ଟି ଏବଂ କଂଗ୍ରେସ ମଧ୍ୟରେ ମେଣ୍ଟ ପୂର୍ବରୁ ଖବରରେ ଅଛି। ଏହି ସମୟରେ, ଅଖିଳେଶ ଯାଦବଙ୍କ ନୂତନ ପଦକ୍ଷେପ ବହୁତ ପ୍ରଭାବଶାଳୀ ହେବା ସହ ଭୋଟ ବ୍ୟାଙ୍କ ହାତେଇବା ରେ ବେଶ୍ ସହାୟତା ପ୍ରଦାନ କରିବ।
Leave a Reply