ଭୁବନେଶ୍ୱର ୨୬/୯: ନାଗାଲାଣ୍ଡରେ ବିଷାକ୍ତ ମଦ ପିଇ ୧୯ ଜଣ ଆଖିବୁଝିଛନ୍ତି | ମଦ ନିଷେଧାଦେଶ ଲାଗୁ ଥିବା ସ୍ୱତ୍ୱ ୧୯ ଜଣଙ୍କ ମୃତ୍ୟୁ ଘଟିଛି | ମଦ ଯୋଗୁ ବ୍ୟାପକ କ୍ଷୟକ୍ଷତି ଘଟିଛି। ରାଜ୍ୟର ମୋକୋକଚୁଙ୍ଗ (Mokokchung) ଏବଂ ଟୁଏନସାଙ୍ଗ (Tuensang) ଜିଲାରେ ଭେଜାଲ ମଦ ପିଇବା ଫଳରେ ଅତିକମରେ ୧୯ ଜଣ ଲୋକଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଶେଷ ୨ ଦିନରେ ମୋକୋକଚୁଂରେ ୮ ଜଣ ଓ ତୁଏନସାଂରେ ୧୧ ଜଣ – ମୋଟ ୧୯ ଜଣକ ମୃତ୍ୟୁ ଘଟିଛି | ମୃତକଙ୍କ ମଧ୍ୟରେ ୨ ପୋଲିସ କର୍ମଚାରୀ ଥିବା ସୂଚନା ମିଳିଛି | ଏହି ମାମଲାର ତଦନ୍ତ ପାଇଁ ଏକ ସ୍ବତନ୍ତ୍ର ତଦନ୍ତକାରୀ ଦଳ (SIT) ଗଠନ କରାଯାଇଛି ଏବଂ ଫୋରେନସିକ ଯାଞ୍ଚ ପାଇଁ ମଦର ନମୁନା ଗୁଆହାଟୀକୁ ପଠାଯାଇଛି।
ଉଲ୍ଲେଖନୀୟ ଯେ, ୧୯୯୦ ମସିହାରୁ ନାଗାଲାଣ୍ଡରେ ମଦ ଉପରେ ସମ୍ପୂର୍ଣ୍ଣ କଟକଣା ଲାଗୁ ରହିଛି।
ଏହି ମୃତ୍ୟୁ ଘଟଣାର ତଦନ୍ତ କରିବା ଏବଂ ସନ୍ଦିଗ୍ଧ ଭେଜାଲ ମଦର ଉତ୍ସ ଚିହ୍ନଟ କରିବା ପାଇଁ ପୋଲିସ ଏକ ସ୍ବତନ୍ତ୍ର ତଦନ୍ତକାରୀ ଦଳ (SIT) ଗଠନ କରିଛି। ବରିଷ୍ଠ ପୋଲିସ ଅଧୀକ୍ଷକ (SSP) ଭେସୁପ୍ରା କେଜୋ ଶନିବାର କହିଛନ୍ତି ଯେ ଏହି ଦଳର ନେତୃତ୍ୱ ଅତିରିକ୍ତ ପୋଲିସ ଅଧୀକ୍ଷକ (ASP) ଆଇ. ବୁଙ୍ଗଲାଙ୍ଗ ଚାଙ୍ଗ ନେଉଛନ୍ତି।
ଉପଯୁକ୍ତ ପରିଚୟ କିମ୍ବା ଲେବଲ ନ ଥିବା କିମ୍ବା ବେଆଇନ ବୋଲି ସନ୍ଦେହ କରାଯାଉଥିବା ମଦ ପାନ ନ କରିବାକୁ ପୋଲିସ ଜନସାଧାରଣଙ୍କୁ ପରାମର୍ଶ ଦେଇଛି। ମଦ ପାନ କରିବା ପରେ ଯଦି କୌଣସି ବ୍ୟକ୍ତିଙ୍କ ଠାରେ ମୁଣ୍ଡ ବୁଲାଇବା, ଦୃଷ୍ଟିଶକ୍ତି ଝାପ୍ସା ହେବା, ନିଶ୍ୱାସ ନେବାରେ କଷ୍ଟ ହେବା କିମ୍ବା ଚେତା ହରାଇବା ଭଳି ଲକ୍ଷଣ ଦେଖାଯାଏ, ତେବେ ତୁରନ୍ତ ଚିକିତ୍ସା ସେବା ଗ୍ରହଣ କରିବାକୁ ମଧ୍ୟ ଅଧିକାରୀମାନେ ଲୋକଙ୍କୁ ଅନୁରୋଧ କରିଛନ୍ତି।
Leave a Reply