ଭୁବନେଶ୍ବର,୨୯/୧୦ : ଓଡ଼ିଆ ସିନେମା ନିର୍ମାଣରେ କୋଟିକୋଟି ଟଙ୍କା ଖର୍ଚ୍ଚ ହେଉଥିବା ନେଇ ପ୍ରଯୋଜକମାନେ ଦାବି କରୁଛନ୍ତି । ଫିଲ୍ମର ପ୍ରଚାର ପ୍ରସାର ପାଇଁ ମଧ୍ୟ ବ୍ୟାପକ ଆୟୋଜନ କରାଯାଉଛି । ଟେଲିଭିଜନ୍, ଖବରକାଗଜ, ୱେବ୍ ମିଡ଼ିଆ ଓ ସୋସିଆଲ ମିଡ଼ିଆରେ ଚାଲୁଛି ଜୋରଦାର ପ୍ରଚାର । ଅଭିନେତା, ଅଭିନେତ୍ରୀ ଓ ପ୍ରଯୋଜକମାନେ ଦର୍ଶକଙ୍କ ନିକଟରେ ଫିଲ୍ମକୁ ପହଞ୍ଚାଇବା ପାଇଁ ଉଦ୍ୟମ କରୁଛନ୍ତି । ତଥାପି ଓଡ଼ିଆ ସିନେମାର ଦର୍ଶକ ସଂଖ୍ୟା ଓ ବ୍ୟବସାୟକୁ ନେଇ ନାନା ପ୍ରଶ୍ନ ଉଠୁଛି । ପ୍ରଶ୍ନ ହେଉଛି, ଏତେ ଖର୍ଚ୍ଚ ଓ ବ୍ୟାପକ ପ୍ରଚାର ସତ୍ତ୍ୱେ ଦର୍ଶକଙ୍କୁ ସିନେମା ହଲକୁ ଆକୃଷ୍ଟ କରିବାରେ କେଉଁଠି ରହିଯାଉଛି ଅଭାବ । କେବଳ ପ୍ରଚାର ଓ ଷ୍ଟାରଙ୍କ ଲୋକପ୍ରିୟତା ଆଧାରରେ ଏକ ସିନେମାର ସଫଳତା ନିଶ୍ଚିତ କରାଯାଇପାରିବ କି ।
ବର୍ତ୍ତମାନ ଦର୍ଶକଙ୍କ ପାଖରେ ମନୋରଞ୍ଜନର ଅନେକ ବିକଳ୍ପ ରହିଛି । ଅନ୍ୟ ଭାଷାର ସିନେମା ସହ ଓଟିଟି ପ୍ଲାଟଫର୍ମ ମଧ୍ୟ ଦର୍ଶକଙ୍କ ପସନ୍ଦକୁ ପ୍ରଭାବିତ କରୁଛି । ଏପରି ସ୍ଥିତିରେ ଓଡ଼ିଆ ସିନେମାକୁ ଦର୍ଶକଙ୍କ ନିକଟରେ ଆହୁରି ଆକର୍ଷଣୀୟ କରିବା ପାଇଁ ଉନ୍ନତ କାହାଣୀ, ଗୁଣାତ୍ମକ ନିର୍ମାଣ, ନୂଆ ପରୀକ୍ଷାନିରୀକ୍ଷା ଓ ଦର୍ଶକଙ୍କ ରୁଚିକୁ ଗୁରୁତ୍ୱ ଦେବା ଆବଶ୍ୟକ ବୋଲି ମତ ପ୍ରକାଶ ପାଉଛି । ସିନେମାର ପ୍ରଚାର ଦର୍ଶକଙ୍କୁ ଫିଲ୍ମ ସମ୍ପର୍କରେ ଅବଗତ କରାଇପାରେ। କିନ୍ତୁ ଦର୍ଶକଙ୍କୁ ହଲକୁ ଆଣିବା ପାଇଁ ଫିଲ୍ମର ବିଷୟବସ୍ତୁ ଓ ଗୁଣବତ୍ତାର ମଧ୍ୟ ଗୁରୁତ୍ୱ ରହିଛି ।
ଅନ୍ୟପକ୍ଷରେ ଟିକେଟ୍ ମୂଲ୍ୟ, ସିନେମା ହଲର ସୁବିଧା ଭଳି ବିଷୟ ମଧ୍ୟ ଦର୍ଶକଙ୍କ ନିଷ୍ପତ୍ତିକୁ ପ୍ରଭାବିତ କରିପାରେ ବୋଲି ଆଲୋଚନା ହେଉଛି । ତେଣୁ ଓଡ଼ିଆ ସିନେମା ଶିଳ୍ପ ପାଇଁ ଏବେ ଆତ୍ମସମୀକ୍ଷାର ସମୟ ଆସିଛି । ପ୍ରଯୋଜକ, ନିର୍ଦ୍ଦେଶକ, କଳାକାର ଓ ବିତରକମାନେ ଦର୍ଶକଙ୍କ ଆଶା ଓ ଆବଶ୍ୟକତାକୁ କେତେ ଗୁରୁତ୍ୱ ଦେଉଛନ୍ତି, ତାହା ଆଲୋଚନାର ବିଷୟ ପାଲଟିଛି ଏବେ । ଓଡ଼ିଆ ସିନେମାର ଉନ୍ନତି ପାଇଁ କେବଳ ବଜେଟ୍ ବୃଦ୍ଧି ଓ ପ୍ରଚାର ନୁହେଁ, ଦର୍ଶକଙ୍କ ବିଶ୍ୱାସ ଓ ଭଲପାଇବା ହାସଲ କରିବା ମଧ୍ୟ ଜରୁରୀ ହୋଇପଡ଼ିଛି ।
ଏବେ ସବୁଠାରୁ ବଡ଼ ପ୍ରଶ୍ନ ଠିଆ ହୋଇଛି ଓଡ଼ିଆ ସିନେମାରେ ଖର୍ଚ୍ଚ ଓ ପ୍ରଚାର ପ୍ରସାର ବଢ଼ୁଥିବାବେଳେ ଦର୍ଶକଙ୍କୁ ହଲମୁହାଁ କରିବା ପାଇଁ ନିର୍ମାତାମାନେ କେଉଁ ନୂଆ ପଦକ୍ଷେପ ନେବେ । ଏହାର ଉତ୍ତର ହିଁ ଓଡ଼ିଆ ସିନେମାର ଆଗାମୀ ଦିଗ ନିର୍ଦ୍ଧାରଣରେ ଗୁରୁତ୍ୱପୂର୍ଣ୍ଣ ହେବ ବୋଲି ସାଧାରଣରେ ଆଲୋଚନା ହେଉଛି ।
Leave a Reply